fo en

Virði og visjónir

Seinastu tíggju árini er áhugin fyri føroyskum mati vaksin munandi. Gourmet, Koks, Spískamarið, Heimblíðni og aðrir mataktørar hava verið sera raskir at sýna fram og selja føroyska matríkidømið.

Fjart er tó millum hesa romantisku mynd av føroysku matmentanini og gerandisstøðuna, har meginparturin av okkara mati verður innfluttur úr fjarskotnum londum. Lambskjøt úr Nýsælandi, egg og ost úr Danmark og epli úr Skotlandi. Hetta eru rávørur, ið kunnu fáast í Føroyum, men av ymiskum orsøkum, t.d. kostnaði og lóggávu, verða vørurnar heldur innfluttar í stórum. Fáar føroyskar matvørur fáast til keyps í sølubúðunum, og ongastaðni fáa vit at vita, hvør framleiðarin er. Framleiðarin er ósjónligur.

Hvør kemur við vøruni? Hvar býr viðkomandi? Hvussu verður vøran dyrkað, veidd, fiskað ella virkað? Hvør er søgan handan vøruna? Hví hevur tað týdning at stuðla staðbundnu framleiðsluni?

Hetta eru týdningarmiklir spurdómar, ið vit royna at svara á Matkovin.fo. Endamálið við heimasíðuni er at stytta teinin millum framleiðara og keypara og menna føroysku matmentanina, -framleiðsluna og -vinnuna. Á Matkovin.fo er føroyski framleiðarin í miðdeplinum.