Vit eru Kári Klettskarð í Kongsstovu (34 ár) og Gunnhild Dahl Niclasen (36 ár). Vit búgva í Haraldssundi, har, sum Kári er uppvaksin. Gunnhild er uppvaksin í Havn og Klaksvík.
Kári er útbúgvin skipsførari og hevur siglt við ymiskum fiskiførum. Hann eigur og rekur útróðrarbátin Kallanes. Harafturat hevur hann tikið landbúnaðarskeið fyri festarar við smáum festum og er seyðamaður fyri Innan á Skarði.
Gunnhild hevur BA í stjórnmálafrøði og MA í Human Økologi. Hon hevur undirvíst í samfelagsfrøði og arbeitt við ymsum verkætlanum og tiltøkum um umhvørvi. Í fjør fór Gunnhild úr starvinum sum miðnámsskúlalærari og gjørdist sjálvstøðug vinnurekandi. Hon er annar av samskiparunum av umhvørvisvikuni hjá Klaksvíkar Kommunu, ið ber heitið Slóða Fyri, og hon arbeiðir eisini í Súkkluhandlinum í Klaksvík.
Jørð hevur altíð verið í familjuni, og í løtuni eru vit fýra ættarlið, sum eru saman um seyðahaldið. Okkum dámar væl, at matframleiðslan er eitt familjutiltak. Øll familjan hjálpist at við seyðahaldinum, og vit varðveita og styrkja týdningarmiklar siðvenjur, sum øll familjan er ein partur av, t.d. samanhald, samstarv og hugni.
Arbeiðsbyrðan er ikki altíð tann sama. Tað veldst um tíðina á árinum. Í januar fara vit eftir veðragjólingum og passa teir inni. Somuleiðis savnast vit øll og gera garnatálg. Februar og marts eru stillir mánaðir, har tíðin fer við at passa veðragjólingarnar. Í apríl fara vit á fjall at geva seyðinum fyribyrgjandi heilivág, og í mai fara vit í feitilendi við veðragjólingunum. Í juni fara vit á fjall í áseyðaroyting, og juli og august mánaður fara við hoygging. Í septembur fara vit eftir veðrunum, sum hava verið í feitilendi, og á fjall eftir restini av seyðinum, ið skal flettast. Vit eru heilt liðug við flettingina og at taka upp í oktobur. Restina av árinum er meira friðaligt, veðragjólingarnir fara út í novembur/desembur.
Tað hevur stóran umhvørvisligan týdning fyri okkum, at matframleiðslan er burðardygg og at allur maturin verður gagnnýttur.
Í skrivandi løtu selja vit rávørur og góðskaðar vørur. Okkum dámar væl at taka ímóti fólki og hava tí ætlanir um at hava heimablídni.
